Liceu Artistik “Jordan Misja” ndodhet i pozicionuar në rrugën e Elbasanit. Vendndodhja e kësaj ndërtese në një kryqëzim rruge dhe zgjidhja harkore që i është dhënë nga ana arkitektonike, krijon një tërheqje të objektit nga rruga duke mundësuar kështu liri shikimi nga të dyja anët e saj.

Liceu Artistik është një objekt me katër kate dhe organizim planimetrik në formë “L”. Fasada e tij karakterizohet nga linja të pastra dhe dritare të mëdha të barazlarguara në distancë. Zgjidhja harkore që i është dhënë hyrjes e bën këtë objekt më mikpritës. Katër kolonat rrethore që ngrihen në të gjithë lartësinë dhe shkallarja që të ngjitet tek hyrja i japin objektit një pamje monumentale.